ស្វាយរៀង៖ កាលពីថ្ងៃទី៣ខែមេសាឆ្នាំ២០១៩ម្សិលមិញនេះ គ្រូពេទ្យឯកជនសល់ពីសម័យប៉ុលពតម្នាក់បានចាក់ថ្នាំមួយម្ជុលទៅលើបុរសម្នាក់ ដែលមានជំងឺឈឺបំពង់ករហើយបានប្រកាច់ស្លាប់ភ្លាមៗ។
ករណីនេះបានកើតឡើងនៅភូមិសំឡីខាងជើងឃុំសំឡីស្រុកកំពង់រោទិ៍ខេត្តស្វាយរៀង ។
ជនរងគ្រោះមានឈ្មោះប៊ុនម៉ាប់ភេទប្រុសអាយុ៤៥ឆ្នាំ មានទីលំនៅភូមិឃុំខាងលើដោយខ្លួនមានអាការៈឈឺបំពង់កចំនួនពីរថ្ងៃមកហើយពុំបាត់។ ទើបខ្លួនបានហៅគ្រូពេទ្យឯកជនឈ្មោះព្រាបសេភេទប្រុសអាយុ៦៣ឆ្នាំ មានទីលំនៅភូមិព្រៃម្នាស់ឃុំសំឡីស្រុកកំពង់រោទ៌មកចាក់ថ្នាំឱ្យ។
ខណៈពេលដែលពេទ្យមកដល់បានបូមថ្នាំមួយស៊ីរ៉ាំងហើយចាក់ទៅលើជនរងគ្រោះ ឈ្មោះប៊ុនម៉ាប់មិនទាន់ទាំងអស់ពីស៊ីរ៉ាំងផងស្រាប់តែជនរងគ្រោះ មានអាការៈរមាស់ក្រហល់ក្រហាយរួចបានប្រកាច់ដាច់ខ្យល់ស្លាប់តែម្ដង ។
ចំណែកឯជនសង្ស័យ ជាគ្រូពេទ្យឯកជនត្រូវសមត្ថកិច្ចឃាត់ខ្លួនដើម្បីសាកសួរចាត់ការទៅតាមនិតិវិធីច្បាប់។ ចំពោះករណីគ្រូពេទ្យចាក់ថ្នាំស្លាប់មនុស្សនេះបើតាមប្រជាពលរដ្ឋនៅឃុំសំឡីបានឲ្យដឹងថា គ្រូពេទ្យឈ្មោះព្រាបសេគាត់ចេះជំនាញពេទ្យនេះពុំមានសាលាច្បាស់លាស់នោះទេ។ ដោយចេះចាក់ថ្នាំតាំងពីសម័យប៉ុលពតមកម្លេះហើយបន្តអាជីពនេះរហូតដល់បច្ចុប្បន្ន។
កន្លងមកមន្ទីរជំនាញបានហៅមកអប់រំតែគាត់នៅតែដើរព្យាបាលគេដដែល ទើបភ្លាត់ស្នៀតចាក់ថ្នាំបណ្តាលឲ្យស្លាប់មនុស្សតែម្តង។ ប្រភពបន្តទៀតថាគាត់ព្យាបាលមិនថាមនុស្សសត្វនោះទេ គឺចាក់ទាំងអស់ទាំងសត្វក្របីគោនិងមនុស្សឱ្យតែត្រូវមានអ្នកហៅគាត់៕
