ភ្នំពេញ៖ លោកបណ្ឌិត វ៉ាន់ វ៉ាត អនុប្រធានមន្ទីររៀបចំដែនដី នគរូបនីយកម្ម និងសំណង់ខេត្តកណ្តាលបានមានប្រសាសន៍ឱ្យដឹងតាមទូរស័ព្ទនាព្រឹកថ្ងៃទី១ឧសភានេះថា បច្ចុប្បន្នក្រុមការងារជំនាញបានចាប់ផ្តើមរាវមីន នៅតំបន់ព្រលានយន្តហោះថ្មីហើយ និងការងារមួយចំនួនទៀតទាក់ទង នឹងបញ្ហាសុវត្ថិភាពរបស់ព្រលានយន្តហោះនេះ បាននិងកំពុងរៀបចំបណ្តើរផងដែរ។
លោកបន្តថា “ក្រសួងរៀបចំដែនដី នគរូបនីយកម្ម និងសំណង់ ក្រោមការដឹកនាំរបស់ឯកឧត្តមឧបនាយករដ្ឋមន្រ្តី ជា សុផារ៉ា បាននិងកំពុងធ្វើការងារជាមួយក្រុមហ៊ុនធំ ដែលវិនិយោគព្រលានយន្តហោះនេះ។ លោកបន្តថា “ខ្ញុំជឿថាលោកមានផែនការច្បាស់លាស់ហើយទាក់ទងនឹងការសាងសង់ព្រលានយន្តហោះនេះ”។
ព្រលានយន្តហោះអន្តរជាតិភ្នំពេញថ្មី គ្រោងសាងសង់់លើផ្ទៃដី៨០០ហិកតា នៃផ្ទៃដីសរុប២៦០០ហិកតា ដែលមួយផ្នែកនៃព្រលានយន្តហោះនេះស្ថិតនៅក្នុងខេត្តកណ្តាល និងខេត្តតាកែវ។
គំរោងវិនិយោគព្រលានយន្តហោះនេះ គ្រោងចំណាយប្រាក់ ១៥០០លានដុល្លារ ដែលវិនិយោគដោយក្រុមហ៊ុនគ្រប់គ្រងដោយលោកឧកញ៉ា ពុង ឃាវសែ សហការជាមួយក្រុមហ៊ុនមួយមកពីប្រទេសចិន។
លោកបណ្ឌិត វ៉ាន់ វ៉ាត បានបន្តថា អាជ្ញាធរខេត្តកណ្តាលបាននិងកំពុងរៀបចំកែសម្រួលប្លង់គោលក្នុងស្រុកកណ្តាលស្ទឹង ខេត្តកណ្តាល ដើម្បីធ្វើយ៉ាងណាឲ្យផែនការអភិវឌ្ឍន៍របស់ស្រុក មានភាពសមស្របនិងបន្ស៊ីគ្នាជាមួយនឹងព្រលានយន្តហោះថ្មីនេះ។ ពិសេសបញ្ហាកែសម្រួលការកកស្ទះចរាចរណ៍ ដែលជាបញ្ហាប្រឈមធំមួយនាពេលបច្ចុប្បន្ននេះ។
នេះបើតាមមន្ត្រីជំនាញខេត្តកណ្តាលបានឲ្យដឹងថា បច្ចុប្បន្ននេះក្រុមការងារពាក់ព័ន្ធ បានចាប់ផ្តើមធ្វើការលើការរៀបចំប្រព័ន្ធសុវត្ថិភាព សំរាប់រៀបចំព្រលានយន្តហោះអន្តរជាតិភ្នំពេញថ្មី ក្នុងខេត្តកណ្តាលហើយ។
ផែនទីសាងសង់ព្រលាន អ្នកនាំពាក្យនិងជារដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិល លោកជា អូនបានមានប្រសាសន៍ថា ការងាររៀបចំសាងសង់ព្រលានយន្តហោះនេះ ត្រូវចំណាយពេលយូរណាស់ ដើម្បីរៀបចំប្រព័ន្ឋសុវត្ថិភាព ផលប៉ះពាល់បរិស្ថានជាដើម ហេតុនេះ លោកមិនអាចបញ្ជាក់បានថា ពេលណាដែលការដ្ឋានសាងសង់នឹងអាចរៀបចំបាននោះទេ៕ប្រភពpropertyarea ដោយ សុខជា
