សេចក្តីប្រកាសព័ត៌មានដែលចេញដោយលោក ម៉ាកូ រូប៊ីអូ បានឲ្យដឹងថា ច្បាប់នេះនឹងដាក់ទណ្ឌកម្មប្រឆាំង បុគ្គល ឬក្រុមហ៊ុនណាដែលចូលរួមជាមួយរដ្ឋាភិបាលក្រុងប៉េកាំងក្នុងសកម្មភាពខុសច្បាប់ នានា។ សកម្មភាពខុសច្បាប់ទាំងនោះរួមមាន ការរំលោភយកដែនកោះ ការបង្កើតកោះសិប្បនិម្មិត និងការកសាងហេដ្ឋារចនាសម្ព័ន្ធទូរគមនាគមន៍ចល័តក្នុងតំបន់ដែលកំពុងមានជម្លោះ ជាដើម។
តាមសេចក្តីប្រកាសព័ត៌មានដែលចេញផ្សាយកាលពីម្សិលមិញ លោក ម៉ាកូ រូប៊ីអូ (Marco Rubio) សមាជិកព្រឹទ្ធសភាមកពីគណបក្សសាធារណរដ្ឋ និងលោក ឌីក ដឺប៊ីន (Dick Durbin) នៃគណបក្សប្រជាធិបតេយ្យ ជាអ្នកដឹកនាំស្នើច្បាប់នេះ។ ក្រុមសមាជិកព្រឹទ្ធសភាអាមេរិក បានស្នើជាថ្មីនូវច្បាប់ដាក់ទណ្ឌកម្មអ្នកដែលពាក់ព័ន្ធជាមួយប្រទេសចិន ក្នុងករណីរំលោភអធិបតេយ្យតំបន់កំពុងមានជម្លោះក្នុងសមុទ្រចិនខាងត្បូង និងខាងកើត។
តាមការចុះផ្សាយរបស់សារព័ត៌មាន South China Morning Post ប្រសិនបើច្បាប់នេះចូលជាធរមាន រដ្ឋាភិបាលអាមេរិកនឹងដកហូតទ្រព្យសម្បត្តិរបស់បុគ្គល ឬក្រុមហ៊ុនចិនទាំងនោះ ឬបដិសេធការចេញទិដ្ឋាការឲ្យពួកគេចូលទឹកដីអាមេរិក។
លោក ម៉ាកូ រូប៊ីអូ បានថ្លែងប្រាប់សារព័ត៌មានដែលមានមូលដ្ឋាននៅទីក្រុងហុងកុងដដែលនេះថា ច្បាប់ដែលស្នើឡើងដោយព្រឹទ្ធសមាជិកទាំងពីរគណបក្សនេះ នឹងពង្រឹងកិច្ចខិតខំប្រឹងប្រែងរបស់សហរដ្ឋអាមេរិកនិង សម្ព័ន្ធមិត្ត ដើម្បីទប់ទល់នឹងសកម្មភាពយោធាដ៏គ្រោះថ្នាក់របស់ចិននៅតំបន់មានជម្លោះក្នុងដែនសមុទ្រចិន ខាងត្បូង។ សមាជិកព្រឹទ្ធសភារូបនេះ បន្ថែមថា ច្បាប់នេះបង្ហាញពីការប្តេជ្ញារបស់អាមេរិកក្នុងការរក្សាតំបន់ សមុទ្រចិនខាងត្បូង ជាតំបន់មួយដែលបើកចំហសម្រាប់គ្រប់ប្រទេសទាំងអស់។ លោកបន្ថែមថាច្បាប់នេះ ក៏នឹង ធ្វើឲ្យចិនទទួលខុសត្រូវចំពោះសកម្មភាពគំរាមកំហែងរបស់ខ្លួនទៅលើប្រទេសផ្សេងៗក្នុងតំបន់ផងដែរ។
ប៉ុន្តែ រដ្ឋាភិបាលក្រុងប៉េកាំង បានហៅសំណើបង្កើតច្បាប់ដាក់ទណ្ឌកម្មក្រុមហ៊ុន និងជនជាតិចិនពីសំណាក់ សមាជិកព្រឹទ្ធសភាអាមេរិកនេះ ថា រំលោភច្បាប់អន្តរជាតិ។ អ្នកនាំពាក្យក្រសួងការបរទេសចិន លោក លូ ខាង បានលើកឡើងបែបនេះក្នុងសន្និសីទសារព័ត៌មានមួយកាលពីម្សិលមិញ។ អ្នកនាំពាក្យក្រសួងការ បរទេសចិនរូបនេះ អះអាងថា ការកសាងសំណង់នានានៅដែនសមុទ្រចិនខាងត្បូង និងសមុទ្រចិនខាងកើត គឺធ្វើឡើងនៅក្នុងដែនអធិបតេយ្យរបស់ចិន។
លោក លូ ខាង បន្ថែមថា ភាគីចិនប្រឆាំងដាច់ខាតនឹងសំណើច្បាប់នេះ។ លោក ក៏បានជំរុញទៅអាមេរិក បញ្ឈប់ដំណើរការច្បាប់នេះជាបន្ទាន់ ដើម្បីកុំឲ្យប៉ះពាល់ដល់ទំនាក់ទំនងទ្វេភាគីរវាងប្រទេស ទាំងពីរ។
ច្បាប់ដាក់ទណ្ឌកម្មអ្នកដែលពាក់ព័ន្ធជាមួយប្រទេសចិន ក្នុងករណីរំលោភអធិបតេយ្យតំបន់កំពុងមានជម្លោះក្នុងសមុទ្រចិនខាងត្បូង និងខាងកើតនេះ ធ្លាប់ត្រូវបានស្នើម្តងរួចទៅហើយកាលពីឆ្នាំ២០១៧ ប៉ុន្តែ វាមិនត្រូវបានអនុម័តទេនៅពេលនោះ៕ប្រភពVOD ដោយ សុខជា
