ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃបានមានប្រសាសន៍នៅថ្ងៃទី ១២ ខែមិថុនា ឆ្នាំ ២០១៩ នេះថា សូមអំពាវនាវកម្លាំងសមត្ថកិច្ច ជាមន្ត្រីនរាជការ ទាំងស៊ីវិល ទាំងកងទ័ព ទាំងកងកម្លាំង ទាំងកងរាជអាវុធហត្ថ ដែលជាអ្នកគ្រប់គ្រងហាមដាច់ខាតកុំចាត់តាំងកម្លាំងរបស់ខ្លួនទៅយាមខារ៉ាអូខេ ។
នៅក្នុងពិធីប្រកាសចូលប្រកាស់កាន់តំណែងក្រុមប្រឹក្សារាជធានីភ្នំពេញ សម្ដេចក្រឡាហោម ស ខេង បន្តថា នៅតាមខារ៉ាអូខេ គឺមានប្រើប្រាស់គ្រឿងញៀន បើយកកម្លាំងទៅការពារគឺខុសហើយ អត់ត្រូវទៅតាមបទបញ្ជា ក្នុងការប្រើប្រាស់កងកម្លាំង ។ មួយវិញទៀត ប្រើកងកម្លាំងទៅយាមកន្លែងប្រើប្រាស់គ្រឿងញៀន គឺកាន់តែខុសធ្ងន់ធ្ងរថែមទៀត ។ រដ្ឋមន្ត្រីក្រសួងមហាផ្ទៃបញ្ជាក់ថា នឹងពិភាក្សាចេញសេចក្ដីសម្រេច ផ្លូវការមួយគឺហាមដាច់ខាតក្នុងការប្រើកម្លាំងទៅធ្វើការលើរឿងនេះ ។
បន្ថែមលើពីនេះទៀត សម្ដេច ស ខេង ហាមដាច់ខាតការប្រើកងកម្លាំងក្រៅផ្លូវការទៅជិះហែរហម អ្នករកស៊ីមានលុយមួយចំនួន ដែលហៅកម្លាំងទៅជិះឡានសារ៉ែនការពារ ជិះបើកផ្លូវ ដូចគណៈប្រតិភូ ដូចនាយករដ្ឋមន្ត្រី ។ សម្ដេចលើកឡើងករណីជាកើស្ដែងមួយ គឺមានកងកម្លាំងទៅជិះបើកផ្លូវ មានឡានសារ៉ែនហែរហមក្រុមហ៊ុនឯកជន ជិះរថយន្តស៊េរីទំនើប ។ សម្ដេច បានអំពាវនាវ ហាមប្រើកម្លាំង ទៅធ្វើការក្រៅផ្លូវការបែបនេះតទៅទៀត ៕
ក្រៅពីករណីនេះនៅមានកងកម្លាំងទៅយាមកាស៊ីណូកន្លែងលេងល្បែងស៊ីសង ក៏ហាមដាច់ខាតដែរ ព្រោះកម្លាំងសមត្ថកិច្ច កងកម្លាំងទាំងអស់ធ្វើការស៊ីប្រាកខែរដ្ឋរឿងអី ហេតុអី បានជាត្រូវទៅយាម កន្លែងលេងបនល្បែង ច្រៀងរាំ បែបនេះទៅវិញ ៕
