ភ្នំពេញ ៖ ប្តីប្រពន្ធ២នាក់ ដេកលង់លក់ភ្លេចបិទទ្វារកណ្តាលអធ្រាត្រដឹងខ្លួន ស្រាប់តែបាត់ម៉ូតូ បាត់កាបូបលុយ អស់ រត់ទៅប្តឹងសមត្ថកិច្ច ហេតុការណ៍នេះបានកើតឡើងកាលពីរំលងអធ្រាតឈានចូល ថ្ងៃទី០២ ខែមិនា ឆ្នាំ២០១៩នៅភូមិជម្ពូវ័ន សង្កាត់ចោមចៅ៣ ខណ្ឌពោធិសែនជ័យ ។
បុរសជាប្តីបានឲ្យដឹងថា នៅពេលវេលាកើតហេតុខាងលើគាត់ជិះម៉ូតូវិលមកពីផ្ទះបងប្អូននៅម្តុំវត្តសំរោងអណ្តែត ខណ្ឌសែនសុខវិញ អូសម៉ូតូដាក់ចូលក្នុងផ្ទះហើយ ក្រោយងូតទឹកអស់កម្លាំងពេកទើបខ្លួនដេកលង់លក់បាត់ទាំងភ្លេចបិទទ្វារកណ្តាលអធ្រាត្រដឹងខ្លួន ស្រាប់តែបាត់ម៉ូតូបាត់ទាំងកាបូបលុយ។
ជនរងគ្រោះជាប្តីឈ្មោះ សូ ពៅ អាយុ៣៩ឆ្នាំ មុខរបរជាងជួសជុលម៉ូតូ ចំណែកប្រពន្ធឈ្មោះ លន់ ស៊ីណា មុខរបរមេផ្ទះ ស្នាក់នៅផ្ទះជួលទើបបាន២ខែនៅកន្លែងកើតហេតុ មានស្រុកកំណើតភូមិកំពង់ថ្នល់ ឃុំល្វា ស្រុកព្រះស្តេច ខេត្តព្រៃវែង ។ ចំណែកម៉ូតូដែលចោរលួចយកទៅបាត់ម៉ាកហុងដា សេ១២៥ សេរី២០១៩ ពណ៌ខ្មៅ ពាក់ស្លាកលេខ ព្រៃវែង 1O-3911 ចំណែកលុយដែលថា ចោរលួចទាំងកាបូបនោះដូចជា មិនប្រក្រតី ប្តីថា បាត់អស់២៣៥០០ដុល្លារ លុយខ្មែរជាង៣០ម៉ឺនរៀល ខ្សែកមាស២ខ្សែរទម្ងន់៦តម្លឹង ។
ចំណែកប្រពន្ធថា បាត់តែ១០០០០ម៉ឺនដុល្លារ លុយខ្មែរជាង៣០ម៉ឺនរៀល ខ្សែករមាស២ខ្សែរទម្ងន់៦តម្លឹង ប្រកែកគ្នារឿងបាត់លុយរវាងប្តី-ប្រពន្ធដែលមើលទៅហាក់មិនប្រក្រតី។
ក្រោយពីបាត់ម៉ូតូបាត់កាបូបលុយនារំលងអធ្រាតឈានចូលថ្ងៃទី០២ ខែមីនាដោយចោរលួច មិនបានទៅប្តឹងភ្លាមទេ រវល់តែតាមស្វែងរករហូតដល់វេលាម៉ោង៨និង៣០នាទីយប់ថ្ងៃទី០២ ខែមីនា ទើបនាំគ្នារត់ទៅដាក់ពាក្យបណ្តឹង ដើម្បីឲ្យសមត្ថកិច្ចជួយស្រាវជ្រាវ ៕
