(វ៉ាស៊ីនតោន) ក្រុមហ៊ុនបណ្តាញសង្គមយក្ស Facebook បានឱ្យដឹងថា ខ្លួនបានដាក់ពាក្យបណ្តឹងទៅកាន់តុលាការសហព័ន្ធអាមេរិក ប្រឆាំងនឹងក្រុមហ៊ុនចំនួន ០៤ និងបុគ្គល ០៣នាក់ មានមូលដ្ឋាននៅក្នុងប្រទេសចិន ពីបទផ្សព្វផ្សាយការលក់គណនី likes និង followers ក្លែងក្លាយ។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃសៅរ៍ ទី០២ ខែមីនា ឆ្នាំ២០១៩។
នៅក្នុងសេចក្ដីថ្លែងការណ៍ចេញផ្សាយលើ blog របស់ខ្លួន ក្រុមហ៊ុន Facebook បានបញ្ជាក់ទៀតថា ក្រុមហ៊ុន និងបុគ្គលទាំងឡាយដែលត្រូវបានចោទប្រកាន់ខាងលើ ក៏បានធ្វើសកម្មភាពផ្សព្វផ្សាយការលក់គណនី likes និង followers ក្លែងក្លាយនៅលើបណ្ដាញទំនាក់ទំនងសង្គមដទៃទៀតដែរ ក្នុងនោះរួមមានទាំង Amazon, Apple, Google, LinkedIn និង Twitter ជាដើម។
គួរបញ្ជាក់ថា បើតាមក្រុមហ៊ុន Facebook ពាក្យបណ្ដឹងនៅពេលនេះគឺជាការចាត់វិធានការមួយ ក្នុងការការពារអ្នកប្រើប្រាស់ និងគោលការណ៍របស់ក្រុមហ៊ុន ក៏ដូចជាពង្រឹងច្បាប់កម្មសិទ្ធិបញ្ញា ខណៈដែលបញ្ហាបែកធ្លាយព័ត៌មានសម្ងាត់របស់អ្នកប្រើប្រាស់ ដូចដែលសារព័ត៌មានបានចេញផ្សាយកន្លងមក ក៏ហាក់មិនទាន់មានចំណាត់ការណាមួយ ប្រកបដោយប្រសិទ្ធភាពខ្ពស់នៅឡើយដែរ ពីសំណាក់បណ្តាញសង្គមដ៏ពេញនិយមបំផុតលើលោកមួយនេះ៕
