(ភ្នំពេញ) បញ្ហាស្រូវធ្លាក់ថ្លៃ គ្មានអ្វីពាក់ព័ន្ធនឹងករណីពន្ធនាំចូលអង្ករទៅទីផ្សារអឺរ៉ុបនោះទេ ហើយអ្នកដែលភ្ជាប់ករណីនេះជាមួយគ្នា គឺជាជនអគតិ និងវិទ្ធង្សសេដ្ឋកិច្ច។ នេះជាការលើកឡើងរបស់លោក វេង សាខុន រដ្ឋមន្ត្រីក្រសួងកសិកម្ម។
ឯកឧត្តម វេង សាខុន ដែលកំពុងរកវិធីដោះស្រាយបញ្ហាស្រូវធ្លាក់ថ្លៃនេះ បានបញ្ជាឲ្យមន្ត្រីកសិកម្ម បើកកិច្ចប្រជុំបន្ទាន់ជាមួយភាគីពាក់ព័ន្ធទាំងអស់ ចូលរួមផ្ដល់ជាយោបល់ដោះស្រាយ និងទប់ស្កាត់បញ្ហាតម្លៃស្រូវនេះ។ ទន្ទឹមនឹងការប្រជុំរកវិធីដោះស្រាយនេះ រដ្ឋមន្ត្រីក្រសួងកសិកម្ម ក៏មិនចង់ឲ្យមជ្ឈដ្ឋានទូទៅ យកបញ្ហាស្រូវធ្លាក់ថ្លៃនេះ ទៅភ្ជាប់នឹងករណីពន្ធអង្ករចូលទីផ្សារអឺរ៉ុបនោះទេ។
ថ្លែងក្នុងពិធីប្រកាសចូលកាន់តំណែងរបស់មន្ត្រីរាជការកសិកម្ម នៅខេត្តកំពង់ចាម នៅថ្ងៃទី២៨ មករានេះ រដ្ឋមន្ត្រីកសិកម្ម បានលើកឡើងដូច្នេះថា៖« មន្ត្រីកសិកម្ម រុក្ខាប្រមាញ់ និងនេសាទ រៀបចំកិច្ចប្រជុំជាបន្ទាន់ ដោយអញ្ជើញមន្ទីរពាក់ព័ន្ធជុំវិញខេត្ត ក្រុមហ៊ុន ឬឈ្មួញប្រមូលទិញស្រូវ ពិសេសអភិបាលនៃគណអភិបាលខេត្ត ដើម្បីសិក្សាពីមូលបញ្ហា រួចដាក់ចេញនូវយន្តការដោះស្រាយ និងចុះអន្តរាគមន៍ជូនប្រជាពលរដ្ឋជាបន្ទាន់ ។ជាពិសេសទប់ស្តាត់ឱ្យបាននូវវិទ្ធង្សនាសេដ្ឋកិច្ចដែលបង្កឡើងដោយជនអគតិដែលយកហេតុផលនៃការធ្លាក់ចុះតម្លៃស្រូវនាពេលនេះ គឺបណ្តាលមកពីសហភាពអឺរ៉ុបយកពន្ធនាំចូលអង្ករពីកម្ពុជាចំនួន ២០០ដុល្លារក្នុង១តោន»។
ក្រៅពីនេះឯកឧត្តម វេង សាខុន ក៏ប្រាប់ឲ្យមន្ត្រីកសិកម្មទាំងនោះ ខិតខំផ្សព្វផ្សាយការងារបច្ចេកទេសទាក់ទងផលិតកម្មស្រូវ បន្លែ ដំណាំកសិឧស្សាហកម្ម ផលិតកម្មសត្វ និងសុខភាពសត្វ ។
ជាពិសេសផ្សព្វផ្សាយពូជ ចំណី ជំងឺ និងពង្រឹងការគ្រប់គ្រងលើការធ្វើអាជីវកម្មសម្ភារកសិកម្មឱ្យបានល្អ។ ដោយឡែកវិស័យព្រៃឈើ និងជលផលវិញ រដ្ឋមន្ត្រីកសិកម្ម បញ្ជាឲ្យមន្ត្រីជំនាញខ្លួន ត្រូវការពារធនធានធម្មជាតិ និងអភិវឌ្ឍសហគមន៍ឱ្យមានការរីកចម្រើន ដើម្បីកែលម្អជីវភាព លើកកម្ពស់ប្រាក់ចំណូល ក្នុងទិសដៅកាត់បន្ថយភាពក្រីក្រ និងការពឹងអាស្រ័យតែលើផល និងអនុផលព្រៃឈើ ហើយត្រូវអភិវឌ្ឃវិស័យវារីវប្បកម្មផងដែរ។ ជាពិសេសអនុវត្តលិខិតបទដ្ឋានគតិយុត្តរបស់ក្រសួង និងរាជរដ្ឋាភិបាលឲ្យមានប្រសិទ្ធភាព។
ទាក់ទងនឹងបញ្ហាស្រូវអង្ករនេះ ឯកឧត្តម វេង សាខុន ក៏បានប្រកាសដាក់វិធានការសំខាន់៤ចំណុច ក្នុងការលើកកម្ពស់ផលិតកម្ម និងធុរកិច្ចស្រូវអង្ករ ដើម្បីជំរុញលទ្ធភាពនៃប្រកួតប្រជែងនាំចេញ។វិធានការសំខាន់ទាំង៤ចំណុច ដែលត្រូវអនុវត្តតាមនោះមាន ចំណុច១ មន្ត្រីជំនាញរបស់ក្រសួង ត្រូវបន្តការស្រាវជ្រាវ និងបញ្ចេញប្រភេទពូជស្រូវក្រអូបប្រណិត និងផលិតកម្មគ្រាប់ពូជស្រូវក្រអូបសុទ្ធ តាមរយៈការផលិតនៅថ្នាក់សហគមន៍ និងក្រុមកសិករផលិតគ្រាប់ពូជ។ ចំណុច២៖ ត្រូវព្យាយាមកាត់បន្ថយថ្លៃដើមផលិតកម្ម ណាដែលមិនចាំបាច់ ហើយត្រូវជំរុញឱ្យបានខ្លាំងបន្ថែម នូវវិធានការបច្ចេកទេសផលិតកម្ម ដែលទទួលបានទិន្នផលខ្ពស់ និងចំណាយតិច រួមជាមួយនឹងការអនុវត្តទំនើបភាវូបនីយកម្មកសិកម្ម។
ចំណុច៣៖ អ្នកប្រមូលទិញស្រូវពីអ្នកផលិត ត្រូវបន្តទំនាក់ទំនងជាមួយធនាគារអភិវឌ្ឍជនបទ ដើម្បីទទួលបានឥណទាន ប្រមូលទិញស្រូវពីកសិករ សហគមន៍កសិកម្ម ដោយមិនត្រូវយកហេតុផលនៃការដាក់វិធានការការពារទីផ្សាររបស់សហគមន៍អឺរ៉ុប មកទម្លាក់ថ្លៃទិញស្រូវពីកសិករឡើយ។ចំណុច៤៖ សហព័ន្ធស្រូវ អង្ករកម្ពុជា គួរយកចិត្តទុកដាក់ជំរុញឱ្យសមាគមន៍ម៉ាស៊ីនកិនស្រូវ ខិតខំបង្កើនសមត្ថភាពកែច្នៃអង្ករ ឱ្យមានគុណភាពបន្ថែមទៀត សម្រាប់បម្រើឱ្យទីផ្សារអន្តរជាតិ។ ពិសេសទីផ្សារប្រទេសចិន ដែលមានរហូតដល់៤០ម៉ឺនតោន ក្នុងឆ្នាំ២០១៩។
ឆ្នាំ២០១៧-២០១៨ កម្ពុជាផលិតស្រូវបានជាង១០,៥លានតោន និងមានភាពលើស(អតិរេក)ស្បៀងជាអង្ករចំនួន៣,៥៥លានតោន ឬ៥,៥៦លានតោនស្រូវ សម្រាប់បម្រើឱ្យការប្រើប្រាស់ឧស្សាហកម្មស្បៀងក្នុងស្រុក និងនាំចេញទៅទីផ្សារអន្តរជាតិ។ ក្នុងនោះការនាំចេញអង្ករកម្ពុជាទៅសហគមន៍អឺរ៉ុបមានជិត ២៧ម៉ឺនតោន ស្មើនឹង៧,៥ភាគរយ នៃចំនួនអង្ករសរុប ក្នុងប្រទេស និងស្មើជិត៤៣ភាគរយ នៃចំនួននាំចេញទៅទីអន្តរជាតិសរុប។ នេះបើតាមរបាយការណ៍របស់ក្រសួងកសិកម្ម៕
