(ភ្នំពេញ) ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានស្នើឲ្យអ្នកអភិវឌ្ឍន៍ ក្នុងវិស័យសំណង់លំនៅដ្ឋាននានា ធ្វើការដោយផ្តោតយកចិត្តទុកដាក់លើការងារសំខាន់ៗចំនួន៧ ។
ឯកឧត្តមបានមានប្រសាសន៍ក្នុងពិធីបិទមហាសន្និបាតលើកទី២ នៃសមាគមអ្នកអភិវឌ្ឍន៍លំនៅឋានកម្ពុជា កាលពីចុងសប្ដាហ៍មុននេះថា អ្នកវិនិយោគលើវិស័យសំណង់ធំៗ និងសំណង់លំនៅដ្ឋានបុរីនានា ត្រូវធ្វើយ៉ាងណាឱ្យបានត្រឹមត្រូវតាមបទដ្ឋានគតិយុត្តិ បច្ចេកទេស និងស្តង់ដា ដើម្បីធានាបានសុវត្ថិភាព គុណភាព សោភណ្ឌភាព និងការគាំពារបរិស្ថាន ដែលតម្រូវអោយមានការសិក្សា អាងប្រព្រឹត្តិកម្មទឹកកង្វក់មុនបង្ហូរចូលលូសាធារណៈជាដើម។
ឯកឧត្តមបន្តថា “ស្របពេលវិស័យសំណង់កំពុងការរីកចំរើនយ៉ាងគំហុក ការពង្រឹងការគ្រប់គ្រងអាជីវកម្មសំណង់ កាន់តែមានភាពចាំបាច់ជាបន្ទាន់ ជាពិសេសសំណង់ធំៗ និងសំណង់អាគារខ្ពស់។
ជាមួយគ្នានេះ ឯកឧត្តមឧបនាយករដ្ឋមន្ត្រី ជា សុផារ៉ា ក៏បានកើតសសើរចំពោះ សមិទ្ធផលនៃសមាគមអ្នកអភិវឌ្ឍន៍លំនៅឋានកម្ពុជា ដេលបានរួមចំណែកក្នុងកិច្ចការពង្រឹងការងារសំណង់នៅកម្ពុជា ក្នុងរយៈពេល៣ឆ្នាំមកនេះ។ វិស័យសំណង់សំណង់នៅកម្ពុជា បានស្រូបយកយកការវិនិយោគជាខ្លាំង ដោយក្នុងឆ្នាំ២០១៨នេះ ការវិនិយោគលើវិស័យសំណង់នៅកម្ពុជា មានទំហំទឹកប្រាក់ប្រមាណជាង៥៤០០លានដុល្លារអាមេរិក ដោយមានចំនួន២៨៦៧គម្រោង និងលើផ្ទៃក្រឡាដីជាង១១លានម៉ែត្រការ៉េ។
លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា ដែលបានជាប់ឆ្នោតសម្រាប់អាណត្តិទី២ឆ្នាំ២០១៩ ២០២១បានមានប្រសាសន៍ថា វិស័យសំណង់និងអចលនទ្រព្យមានការរីកចម្រើន ហើយក្នុងវិស័យនេះត្រូវបែងចែកជាបីផ្នែក គឺសំណង់រៀបរយ សំណង់មិនរៀបរយ និងសំណង់អាគារខ្ពស់ៗ ដែលសមាគមបាននិងកំពុងធ្វើការយ៉ាងសកម្ម ដើម្បីធ្វើយ៉ាងណាជំរុញឲ្យមានការអភិវឌ្ឍប្រកបដោយនិរន្តរភាព។
ជាមួយគ្នានេះលោកឧកញ៉ា បានដាក់ចេញនូវផែនការចំនួន ៧ចំណុច ដើម្បីជំរុញការអភិវឌ្ឍក្នុងវិស័យនេះកាន់តែមានភាពល្អប្រសើរ និងជួយរដ្ឋាភិបាលក្នុងការជំរុញកំនើនសេដ្ឋកិច្ចជាតិ ក៏ដូចជាគាំទ្រគោលនយោបាយអភិវឌ្ឍន៍លំនៅដ្ឋានរបស់រដ្ឋាភិបាល៕ប្រភព propertyarea
