មន្ត្រីបរិស្ថានខេត្តបាត់ដំបងបានឱ្យដឹងថា ព្រែកទាល់ដែលជាដែនអភិរក្សសត្វស្លាបដ៏ធំមួយនៅកណ្តាលបឹងទន្លេសាបនោះ នៅពេលនេះកំពុងមានការកើនឡើងនូវចំនួនសត្វស្លាបយ៉ាងច្រើនគិតមកដល់ ឆ្នាំ ២០១៨ នេះ ។
លោក កប បូរ៉ាន់ ប្រធានមន្ទីរបរិស្ថានខេត្តបាត់ដំបងបានឱ្យដឹងថា ចំនួនបក្សីបានកើនឡើងប្រមាណជា ៣០ភាគរយ បើធៀបទៅនឹង ២ ឆ្នាំមុន ដោយសារនៅទីនេះ វាបានប្រមូលផ្តុំសត្វនានាមករស់នៅទីនេះ ដែលសំបូរត្រីជាចំណីរបស់វា ។ ហើយវាបានកើន ២០ ភាករយ បានមកពីការបន្តពូជកើតជាកូន ធ្វើសំបុករស់នៅទីនេះតែម្តង និង ១០ ភាគរយទៀតចូលមករស់នៅពីតំបន់ខាងក្រៅ ។ នៅឆ្នាំ ២០១៨ នេះ ព្រែកទាល់ស្ងប់ស្ងាត់ស្ទើរតែគ្មានបទល្មើសទាំងការលួចចូលយកពងសត្វ និង លួចចូលចាប់ត្រីក្នុងដែនការពារនោះឡើយ ។
ព្រែកទាល់គឺជាបន្ទាយសត្វស្លាបដ៏ធំមួយមានសក្តានុពលខ្លាំងណាស់ ដែលធ្វើឱ្យសត្វស្លាប ១១០ ប្រភេទរស់នៅជាមួយគ្នាបានដោយសុខដុមរម្យនា ។ ដើមឈើមួយចំនួនធំ គេឃើញសំបុកសត្វ កំពុងក្រាបពងកូន និង សំឡេងសត្វស្រែកយ៉ាងកងរំពង និង ហើរប្រទាក់ក្រឡាគ្នាពាសពេញផ្ទៃមេឃ នេះក៏ជាគោលដៅទេសចរមួយយ៉ាងសំខាន់ ។
លោកប្រធានមន្ទីរបរិស្ថានខេត្តបានឱ្យដឹងទៀតថា ឆ្នាំ ២០១៨ នេះ ភ្ញៀវទេសចរបរទេសបានមកកម្សាន្តនៅទីនេះច្រើន ប៉ុន្តែអ្វីដែលលំបាកដល់ភ្ញៀវមកដល់ទីនេះ គឺផ្លូវទឹកធ្វើដំណើរតាមទូក ការណូតពិបាក ពេលរដូវប្រាំងទឹករាក់ពេក ។ ព្រែកទាល់ជាដែនអភិរក្សមួយល្បីតាំងពីទសវត្សរ៍ឆ្នាំ ៦០ មកម្ល៉េះ ហើយរក្សាទុកបានរហូតមកដល់សព្វថ្ងៃនេះ ។
ពេលនេះ ក្រសួងបរិស្ថាន និង អាជ្ញាធរខេត្តគួរបើកផ្លូវនាវាចរណ៍ឱ្យបានធំ ដើម្បីពង្រីកសក្តានុពលទេសចរណ៍ឱ្យបានខ្លាំងក្លា សម្រាប់ស្រូបយកប្រាក់ចំណូលពីភ្ញៀវ ដើម្បីកុំឱ្យឱកាសនេះរំលងហួសទៅ ៕ប្រភពFB
