(ភ្នំពេញ) នារសៀលថ្ងៃពុធ ៥កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១២ ខែធ្នូ ឆ្នាំ២០១៨ នៅទីស្តីការក្រុមប្រឹក្សា អភិវឌ្ឍន៍កម្ពុជា ឯកឧត្តម ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុកជាអគ្គលេខាធិការគណៈកម្មាធិការ នីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា (គ.ជ.នា/ក.អ.ក) បានទទួលជួបសម្តែងការគួរសម និងពិភាក្សាការងារជាមួយឯកឧត្តម Václav Bálek អគ្គនាយកទទួលបន្ទុកកិច្ចសហប្រតិបត្តិការអភិវឌ្ឍន៍ និងជំនួយមនុស្សធម៌នៃក្រសួងការបរទេសនៃសាធារណរដ្ឋឆែក និងអមដំណើរដោយឯកឧត្តម Marek Libřicky ឯកអគ្គរដ្ឋទូតសាធារណរដ្ឋឆែកប្រចាំកម្ពុជា ក្នុងឱកាសបំពេញទស្សនកិច្ចផ្លូវការនៅកម្ពុជាចាប់ពីថ្ងៃទី១១ ដល់ថ្ងៃទី១៣ ខែធ្នូ ឆ្នាំ២០១៨ ។ គោលដៅចម្បងនៃជំនួបនេះ គឺដើម្បីពិនិត្យ និងពិភាក្សាលើវឌ្ឍនភាពនៃការអនុវត្តកម្មវិធីកិច្ចសហប្រតិបត្តិការអភិវឌ្ឍន៍ទ្វេភាគីរបស់សាធារណរដ្ឋឆែកសម្រាប់កម្ពុជា ឆ្នាំ២០១៨-២០២៣ (Bilateral Development Cooperation Programme of the Czech Republic for Cambodia 2018-2023) ដែលត្រូវបានប្រកាសឱ្យអនុវត្តជាផ្លូវការនាខែឧសភា ឆ្នាំ២០១៨ កន្លងទៅ ព្រមទាំងដើម្បីបន្តពង្រឹងកិច្ចសហប្រតិបត្តិការអភិវឌ្ឍន៍ទ្វេភាគីឱ្យកាន់តែប្រសើរ ៕
