(ខេត្តកំពត) កាលពីថ្ងៃទី១៦ ខែវិច្ឆិកា ឆ្នាំ២០១៨ នាយកដ្ឋានជីវៈចម្រុះ នៃអគ្គលេខាធិការដ្ឋានក្រុមជាតិ អភិវឌ្ឍដោយចីរភាព សហការជាមួយមន្ទីរបរិស្ថានខេត្តកំពត បានរៀបចំវគ្គបណ្ដុះបណ្ដាលស្តីពី «វិធីសាស្រ្តប្រមូលសំណាកកេសរកូលព្រៃ» នៅក្នុងឧទ្យានជាតិព្រះមុនីវង្ស «បូកគោ» ខេត្តកំពត។
វគ្គបណ្តុះបណ្តាលនេះមានការចូលរួមពីមន្រ្តីឧទ្យានុរក្សខេត្តកំពត នាយកឧទ្យានជាតិព្រះជ័យវរ្ម័ន-នរោត្តម ភ្នំគូលែន និស្សិតសាកលវិទ្យាល័យភូមិន្ទភ្នំពេញ ម្ចាស់កសិដ្ឋានThe Bloom Garden Greenhouse និងក្រុមCambodia Amazing Trip Planner ដែលមានសមាជិកចូលរួមសរុបចំនួន៣៥នាក់ (ស្រី០៦នាក់)។
បន្ទាប់ពីបញ្ចប់វគ្គបណ្តុះបណ្តាល ក្រុមការងារបានចុះអនុវត្តជាក់ស្តែងពីវិធីសាស្ត្រប្រមូលសំណាកក្នុងបរិវេណឧទ្យានជាតិព្រះ មុនីវង្សបូកគោ ក្នុងតំបន់ទឹកធ្លាក់ វាលស្រែ៥០០ ទំនប់ទឹក និងព្រះវិហារ ដែលក្នុងនោះបានប្រមូលសំណាកកេសរកូលព្រៃចំនួនប្រមាណ៧០-១០០ សំណាក ស្មើនឹង២៥ប្រភេទ (៤ប្រភេទជាប្រភេទកម្រ)។
សូមជម្រាបផងដែរថា រាល់សំណាកដែលប្រមូលបាន ត្រូវបានក្រុមការងារដឹកជញ្ជូនទៅរក្សាទុកក្នុងមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ដើម្បីគាំទ្រដល់ដំណើរការរៀបចំមជ្ឈមណ្ឌលសិក្សាស្រាវជ្រាវ និងអភិរក្សប្រភេទក្នុងស្រុក៕ ប្រភពFB
