(ភ្នំពេញ) បន្ទាប់ពីមានយុទ្ធនាការប្រមូលស្នាមមេដៃរបស់ប្រជាពលរដ្ឋ នៅទូទាំងប្រទេស ដែលគហៅ “ស្នាមមេដៃមួយដើម្បីកោះត្រល់” ចាប់ពីថ្ងៃទី០៨ ខែសីហា ឆ្នាំ២០១៨ ដែលដឹកនាំដោយគណបក្សខ្មែរក្រោក នោះមក អ្នកនាំពាក្យក្រសួងមហាផ្ទៃ និងអភិបាលរាជធានីភ្នំពេញ ក៏បានព្រមានថា នឹងចាត់វិធានការតាមផ្លូវច្បាប់ បើសិនគ្មានច្បាប់អនុញ្ញាត។
កាលពីពេលថ្មីៗនេះ គណបក្សខ្មែរក្រោកបានប្រកាសអំពីផែនការ ធ្វើយុទ្ធនាការប្រមូលស្នាមមេដៃរបស់ប្រជាពលរដ្ឋ នៅទូទាំងប្រទេស “ស្នាមមេដៃមួយដើម្បីកោះត្រល់” ចាប់ពីថ្ងៃទី៨ ខែសីហា ឆ្នាំ២០១៨ ខាងមុខនេះ។ បន្ទាប់ពីមានការប្រកាសបែបនេះ ទាំងអាជ្ញាធររាជធានីភ្នំពេញ និងអ្នកនាំពាក្យក្រសួងមហាផ្ទៃ ក៏បានព្រមានចាត់វិធានការតាមផ្លូវ ច្បាប់ប្រឆាំងនឹងអ្នកធ្វើយុទ្ធនាការនេះ។
ឯកឧត្តមនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់អ្នកកាសែតថា ការធ្វើអ្វីៗក៏ដោយ ត្រូវតែមានលិខិតស្នើសុំទៅអាជ្ញាធរឲ្យបានត្រឹមត្រូវ គឺអនុវត្តទៅតាមច្បាប់បាតុកម្ម ដោយសន្តិវិធី។
ស្របគ្នានេះដែរ ឯកឧត្តម ឃួង ស្រេង អភិបាលរាជធានីភ្នំពេញ ក៏បានថ្លែងដែរថា ការធ្វើអ្វីៗ គឺត្រូវអនុវត្តទៅតាមច្បាប់ ពីព្រោះគាត់ជាគណបក្សនយោបាយ ត្រូវសិក្សាអំពីច្បាប់ឲ្យបានច្បាស់លាស់ ចៀសវាងខុសឆ្គងអំពីបញ្ហាច្បាប់ ពីព្រោះវានាំឲ្យប៉ះពាល់ទៅដល់សង្គមជាតិ។
ឯកឧត្តមអភិបាលរាជធានីភ្នំពេញ បានបញ្ជាក់ថា “ប្រទេសមានច្បាប់ អនុវត្តតាមច្បាប់ទើបត្រូវ អ្នកមិនអនុវត្តតាមច្បាប់ គឺមានកំហុសឆ្គងជាមួយផ្លូវច្បាប់ មិនអាចអត់ឱនឲ្យបានទេ”។
សូមជម្រាបថា គណបក្សខ្មែរក្រោកបានប្រកាសធ្វើយុទ្ធនាការប្រមូលស្នាមមេដៃប្រជាពលរដ្ឋ នៅទូទាំងប្រទេស ដើម្បីរៀបចំប្តឹងទៅក្រុមប្រឹក្សាធម្មនុញ្ញ និងតុលាការ ICJ ដើម្បីទាមទារកោះត្រល់ពីប្រទេសវៀតណាម មកឲ្យកម្ពុជាវិញ។ប្រភពKBN
សូមអានខ្លឹមសារ ទាំងស្រុងដូចខាងក្រោម៖
