ភ្នំពេញ ៖ បើយោងតាមរបាយការណ៍របស់គ្រឹះស្ថានអង្គរ នៅថ្ងៃទី១ខែសីហា បានឲ្យដឹងថា រយៈពេល៧ខែ ឆ្នាំ២០១៨ មានភ្ញៀវទេសចរបរទេស ចំនួន១.៥៤២.៨៣៩នាក់ បានទិញប័ណ្ណចូលទស្សនារមណីយដ្ឋានអង្គរ ដែលមានការកើន៨,៩៧ភាគរយបើធៀបនឹងរយៈពេលដូចគ្នាឆ្នាំ២០១៧ ដោយទទួលបានចំណូលសរុប៦៩.៦៦៤.៨៦៨ដុល្លារ កើន១៥,៣៦ភាគរយ បើប្រៀបធៀបទៅនឹងរយៈពេលដូចគ្នា កាលពីឆ្នាំ២០១៧។បើតាមរបាយការណ៍របស់គ្រឹះស្ថានអង្គរ សម្រាប់ពេញ១ខែកក្កដា ឆ្នាំ២០១៨ មានភ្ញៀវទេសចរបរទេសចំនួន១៨៥.៨៧៨នាក់ បានទិញប័ណ្ណចូលទស្សនារមណីយដ្ឋានអង្គរ មានការកើនឡើង១,៧៥ភាគរយ បើធៀបរយៈពេលដូចគ្នានៃឆ្នាំ២០១៧ ដែលអាចរកចំណូលជូនរដ្ឋបាន ៨.១៩២.៥២១ដុល្លារ មានការកើនឡើង ០,៣៨ភាគរយ និងបានចំណូលចំនួន៣៧១.៧៥៦ដុល្លារ ត្រូវបានបង់ចូលមូលនីធិមន្ទីរពេទ្យគន្ធបុប្ផា៕
គ្រឹះស្ថានអង្គរបញ្ជាក់ដែរថា រយៈពេល៧ខែកន្លងទៅនេះ ចំណូលបានពីការលក់ប័ណ្ណចូលទស្សនាអង្គរចំនួន ៣.០៨៥.៦៧៨ដុល្លារ ត្រូវបានបង់ចូលមូលនិធិមន្ទីរពេទ្យគន្ធបុប្ផា ដើម្បីចូលរួមក្នុងសកម្មភាពសង្គ្រោះជីវិតកុមារកម្ពុជា៕
