(សៀមរាប) យ៉ាងហោចណាស់ មានមនុស្សប្រុស ស្រីចំនួន៤នាក់បានស្លាប់ និង៥នាក់ផ្សេងទៀតរបួសធ្ងន់ ,ស្រាលដោយករណីគ្រោះថ្នាក់ ចរាចរណ៍ កាលពីម៉ោង៩និង៤០នាទីព្រឹកថ្ងៃ២៧ ខែមិថុនា២០១៨ នៅចំណុចផ្លូវជាតិលេខ៦ ភូមិដំណាក់ស្លាញ ឃុំសសរស្តម្ភ ស្រុកពួក ខេត្តសៀមរាប ។ តាមរបាយការណ៍ពីអធិការនគរបាលស្រុកពួកបញ្ជាក់ថា ហេតុការណ៍នេះបង្កដោយរថយន្ត Camry ឆ្លាមព៌ណត្រីឆ្លូញ ពាក់ស្លាក លេខ ភ្នំពេញ 2Q-0932 បើកបរពីលិចទៅកើតដឹកអ្នកដំណើរ៥នាក់ លុះដល់ចំណុចកើតហេតុក៏បានរេចង្កូតបុកម៉ូតូC125 ពណ៌ខ្មៅ ដែលជិះបញ្ច្រាស់ទិសគ្នា បើកបរដោយឈ្មោះសុន សែន ភេទប្រុស អាយុ៣៤ឆ្នាំ មុខរបរធ្វើស្រែ ស្ថិតនៅភូមិច្រនៀង ឃុំព្រៃជ្រូក ស្រុកពួក ដែលគាត់កំពុងជិះម៉ូតូដឹកប្រពន្ធ និងកូន២នាក់ បណ្តាលអោយភាគីខាងម៉ូតូស្លាប់ទាំងបួននាក់នៅនឹងកន្លែង ចំណែករថយន្តក៏ជ្រុលធ្លាក់ចូលប្រឡាយ ធ្វើអោយមនុស្សជិះក្នុងរថយន្ត៥នាក់រងរបួសធ្ងន់និងស្រាល។
បន្ទាប់ពីបង្កហេតុរួចអ្នកបើកបររថយន្តបានរត់គេចខ្លួនបាត់។ លោកអធិការបន្តថា បន្ទាប់ពីកើតហេតុកម្លាំងសមត្ថកិច្ចបានចុះដល់កន្លែងកើតហេតុ ដើម្បីជួយសង្រ្គោះអ្នក រងរបួស និងវាស់វែងធ្វើកំណត់ហេតុ យកវត្ថុតាងទៅរក្សាទុក។ ចំណែកសាកសពជនរងគ្រោះប្រគល់ជូនក្រុមគ្រួសារ យកទៅធ្វើបុណ្យតាមប្រពៃណីយ៍៕
