ក្រចេះ៖ បន្ទាប់ពីការពុលស្រាស នៅខេត្តក្រចេះ ហើយឥឡូវនេះ មនុស្សក្មេងចាស់ប្រុសស្រីប្រមាណជិត១០០នាក់ បានរងការពុលចំណីអាហារ ដែលពួកគេបានបរិភោគពីក្នុងពិធីជួបជុំមួយកាលពីល្ងាចថ្ងៃសុក្រម្សិលមិញ។ យ៉ាងណា ប្រធានមន្ទីរសុខាភិបាលខេត្ត បញ្ជាក់ថា អ្នកជំងឺទាំងអស់បានធូរស្រាលអស់ហើយ ហើយក្រុមការងារជំនាញក៏កំពុងបន្តស្រាវជ្រាវរកមូលហេតុពិតផងដែរ។
ប្រធានមន្ទីរសុខាភិបាលខេត្តក្រចេះ លោក ឈ្នាង សុវុត្ថា ប្រាប់អង្គភាពសារព័ត៌មានថា នៅព្រឹកថ្ងៃសៅរ៍នេះថា មានផ្ទុះករណីពុលជាថ្មីទៅលើប្រជាពលរដ្ឋរស់នៅក្នុងភូមិត្រពាំងទ្រាំង ឃុំចង្ក្រង ស្រុកចិត្របុរី ខេត្តក្រចេះ កាលពីវេលាម៉ោង៤៖៣០នាទីរសៀល ថ្ងៃសុក្រ ទី២៥ ខែឧសភា ឆ្នាំ២០១៨ ដោយប្រជាពលរដ្ឋជាច្រើន មានអាការៈដូចៗគ្នា គឺ ឈឺពោះ ក្អួតចង្អោ អស់កម្លាំង ចំពោះកុមារមានរាគបន្ថែម។
ចំពោះការផ្ទុះករណីពុលជាថ្មី នៅក្នុងស្រុកចិត្របុរីនេះ លោក ឈ្នាង សុវុត្ថា បានបញ្ជាក់ថា អ្នកជំងឺទាំងអស់ បានហូបនំប៉័ងនៅក្នុងពិធីប្រជុំផ្សព្វផ្សាយពិគ្រោះយោបល់ ស្ដីពីការជំរុញទីផ្សារខ្នាតតូចផលិតផលដំឡូងមី។ បែបណា លោកថា ក្រុមការងារឆ្លើយតបបន្ទាន់ កំពុងបន្តចុះធ្វើការស្រាវជ្រាវរកមូលហេតុពិតប្រាកដហើយ។
បើតាមប្រធានមន្ទីរ គិតត្រឹមម៉ោង៥៖០០នាទីទៀបភ្លឺ ថ្ងៃសៅរ៍ ទី២៦ ខែឧសភា ឆ្នាំ២០១៨នេះ ប្រជាពលរដ្ឋ ដែលរងការពុលសរុបមានចំនួន៧៥នាក់ ស្រី៣៩នាក់ ក្នុងនោះមានកុមារ៥៣នាក់។ លោកបន្តថា អ្នកជំងឺចំនួន៤០នាក់ ក្នុងនោះ មានស្រី២១នាក់ និងកុមារ២១នាក់ ត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យបង្អែកខេត្ត ខណៈអ្នកជំងឺ៣៥នាក់ មានស្រី១៨នាក់ និងកុមារ២១នាក់ បានសម្រាកព្យាបាលនៅមណ្ឌលសុខភាពក្នុងមូលដ្ឋាន។
គួរបញ្ជាក់ថា ចាប់តាំងពីដើមខែ រហូតមកទល់នឹងចុងខែឧសភានេះ ប្រជាពលរដ្ឋជាច្រើនរយនាក់ នៅក្នុងស្រុកចិត្របុរី ខេត្តក្រចេះ បានរងការពុលជាបន្តបន្ទាប់ ដោយបានសម្លាប់មនុស្សផងដែរ។
កាលពីដើមខែឧសភាកន្លងទៅ មានករណីពុលពលរដ្ឋនៅក្នុងភូមិចំនួន៤ ក្នុងឃុំកន្ទួត ស្រុកចិត្របុរី ខេត្តក្រចេះ ដោយបានសម្លាប់ប្រជាពលរដ្ឋចំនួន១៣នាក់ និងជាង២០០នាក់ទៀត ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។ អ្នកភូមិជាច្រើន មានរោគសញ្ញាដូចៗគ្នា ដូចជា ឈឺពោះ ក្អួតចង្អោរ ឈឺក អស់កម្លាំង ទន់ដៃទន់ជើង វិលមុខ និងថប់ដង្ហើមជាដើម។
