ក្រុមអ្នកជួយសង្គ្រោះនៅក្នុងប្រទេសឥណ្ឌូនេស៊ីបាននឹងកំពុងតស៊ូនឹងភ្លៀងធ្លាក់ខ្លាំង នៅថ្ងៃច័ន្ធនេះក្នុងការស្វែងរកអ្នកនៅរស់រានមានជីវិត និង អ្នកបាត់ខ្លួន បន្ទាប់ពីរលកយក្សស៊ូណាមីបានសម្លាប់មនុស្សយ៉ាងហោចណាស់ ២៨១នាក់ ដោយអ្នកជំនាញបានឱ្យដឹងដែរថា តំបន់ដែលទទួលរងផលប៉ះពាល់នេះ អាចប្រឈមនឹងរលកបោកបក់ជាថ្មីទៀត ។
ទីភ្នាក់ងារគ្រប់គ្រងគ្រោះមហន្តរាយជាតិបាននិយាយថា តួលេខអ្នកស្លាប់អាចនឹងកើនឡើង នៅពេលដែលមនុស្សចំនួនជាង ៥០នាក់ទៀតកំពុងបាត់ខ្លួននៅឡើយ។ មនុស្សជាង ១០០០នាក់បានរងរបួសនៅក្នុងគ្រោះមហន្តរាយ កាលពីល្ងាចថ្ងៃសៅរ៍កន្លងទៅនេះ នេះបើយោងតាម អ្នកនាំពាក្យលោក Sutopo Purwo Nugroho នៅភ្នាក់ងារគ្រោះមហន្តរាយ ។
ក្រុមជួយសង្គ្រោះបាននឹងកំពុងជីកកកាយ និង ប្រើឧបករណ៍ធុនធំៗដើម្បីដឹកជញ្ជូនបំណែកខូចខាត ចេញពីតំបន់រងគ្រោះស្ថិតនៅតំបន់ Sunda Strait ក្បែរសមុទ្រ ៕
