(វៀតណាម) ប៉ូលិសក្រុងហូជីមិញ ជាមួយនឹងសមត្ថកិច្ចចម្រុះ ដោយប្រើប្រាស់កម្លាំងប៉ូលិសអន្តរាគមន៍ជិត១វរៈសេនាធំ នៅវេលាទៀបភ្លឺ ថ្ងៃទី ២៦ ខែឧសភានេះ បានហ៊ុំព័ទ្ធ និងឆ្មក់ចូលហាង Phoenix នៅសង្កាត់លេខ១ ចាប់ខ្លួនបាននារីជាង ៣០នាក់ ស្លៀកពាក់របៀបខ្វះក្រណាត់ កំពុងបម្រើភ្ញៀវយ៉ាងក្តៅគគុកក្នុងខារ៉ាអូខេ ។
នៅទីនោះក្រៅពីស្រីសាច់សម៉ត់ខៃ ក៏នៅមានម្សៅស សម្រាប់បម្រើភ្ញៀវថែមទៀតផង។ គេក៏បានចាប់ខ្លួន “ស្រីស្រស់ប្រុសស្អាត” ១០គូ កំពុងតែឡើងឋានសួគ៌នឹងគ្រឿងញៀន ។
នៅអាធ្រាតថ្ងៃទី ២៥ ខែឧសភា សមត្ថកិច្ចខាងលើ ក៏បានឆ្មក់ចូលសណ្ឋាគារទេសចរណ៍ Sai Gon Star ស្ថិតក្នុងសង្កាត់លេខ ៣ ក្រុងហូជីមិញដដែល នៅទីនោះគេក៏ចាប់បានមុខសញ្ញាស្រីប្រុសកំពុងតែសប្បាយៗនឹងគ្រឿងញៀន ។ក្នុងបន្ទប់ VIP ៦ នៃសណ្ឋាគារនេះ មាននារីអ្នកបម្រើស្លៀកពាក់បែបស្រើបស្រាល ចំនួន ៥២នាក់ កំពុងអង្គុយច្រៀងខារ៉ាអូខេជាមួយភ្ញៀវបរទេស ។
នៅកន្លែងទាំងពីរនេះ ក្រុមសមត្ថកិច្ចចម្រុះបានធ្វើការចោទប្រកាន់ពីបទល្មើសយ៉ាងច្រើន ពិសេសគឺការសេពគ្រឿងញៀន និងពេស្យាចារ ។នៅស្រុកគេឥឡូវពុំត្រឹមតែនារីបម្រើទេ ដែលត្រូវចាប់ខ្លួន ពួកប្រុសៗក៏ត្រូវចាប់បញ្ជូនទៅប៉ុស្តិ៍ប៉ូលិសដែរ ។
គួរកត់សម្គាល់ថា នៅក្នុងកន្លែងទាំងពីរនេះ មានច្រករំដោះខ្លួនច្រើន ប៉ុន្តែមុននោះ ប៉ូលិសបានសិក្សាលំអិត និងដាក់កម្លាំងបិទច្រកទាំងនោះរួចស្រេច ៕
