ក្រុមយក្សអេស្ប៉ាញ Real Madrid បានច្រានចោលនូវការចុះផ្សាយរបស់ទូរទស្សន៍អេស្ប៉ាញដែលបានរាយការណ៍ថាពួកគេកំពុងព្យាយាមក្នុងការចុះហត្ថលេខាទិញខ្សែប្រយុទ្ធរបស់ក្រុម Paris St-Germain និងក្រុមជម្រើសជាតិប្រេស៊ីលគឺកីឡាករ Neymar ។ បច្ចុប្បន្នស្ថិតក្នុងវ័យ ២៦ ឆ្នាំ, Neymar ដែលត្រូវបានក្រុមនៃលីកកំពូលរបស់បារាំងចុះហត្ថលេខាទិញពីក្រុមអ្នកមានបុណ្យ Barcelona កាលពីរដូវក្ដៅឆ្នាំទៅជាមួយនឹងតម្លៃខ្លួនបំបែកកំណត់ត្រាពិភពលោក ២០០ លានផោនរូបនេះបានរកគ្រាប់បាល់បញ្ចូលទីបានចំនួន ២ គ្រាប់នៅឯព្រឹត្តិការណ៍នៃការប្រកួតពានរង្វាន់បាល់ទាត់ពិភពលោកឆ្នាំ ២០១៨ និងបានជួយឲ្យប្រេស៊ីលកក់កៅអីឡើងទៅកាន់វគ្គ ៨ ក្រុមចុងក្រោយដែលពួកគេត្រូវប៉ះគ្នាជាមួយក្រុមជម្រើសជាតិប៊ែលហ្ស៊ីក។
ដោយឡែកទាក់ទិននឹងពាក្យចរចាមអារ៉ាមផ្សាភ្ជាប់ការផ្ទេរ Neymar ទៅកាន់ទឹកដី Bernabeu ក្រុម Real Madrid បានចេញសេចក្ដីថ្លែងការណ៍មួយថា ៖ “ពត៌មានដែលចេញផ្សាយដោយបុស្ដិ៍ទូរទស្សន៍ TVE គឺខុសពីការពិតទាំងស្រុង។ ក្រុម Real Madrid មិនបានធ្វើការដាក់សំណើណាមួយទាល់តែសោះទៅកាន់ក្រុម PSG ឬកីឡាករដូចដែលពួកគេបានចុះផ្សាយ។” គួរបញ្ជាក់ផងដែរថាបុស្ដិ៍ទូរទស្សន៍ TVE ដែលជាបុស្ដិ៍ទូរទស្សន៍មួយស្ថិតក្រោមការគ្រប់គ្រងរបស់រដ្ឋាភិបាលអេស្ប៉ាញមួយនេះបានចុះផ្សាយថា Real Madrid បានដាក់សំណើរហូតដល់ទៅ ៣១០ លានអឺរ៉ូដើម្បីសុំដេញថ្លៃទិញយក Neymar ដែលតម្លៃនេះនឹងយកឈ្នះលើកំណត់ត្រាដែលត្រូវបានបំបែករួចកាលពីគាត់ចុះចូលជាមួយ PSG កាលពីមួយឆ្នាំមុន។ ចាប់តាំងពីការផ្ទេរចូលទីក្រុងប៉ារីស Neymar រកគ្រាប់បាល់បញ្ចូលទីបាន ២៨ គ្រាប់ពីការបង្ហាញខ្លួន ៣០ ប្រកួតឲ្យ PSG ។
ប្រែសម្រួល ៖ ភក្ដី
