ខ្សែបម្រើ Mateo Kovacic ត្រូវបានគេរាយការណ៍ឲ្យដឹងថាគាត់បានធ្វើឲ្យក្រុមយក្សអេស្ប៉ាញ Real Madrid មានការភ្ញាក់ផ្អើលជាមួយនឹងការលេចឮដំណឹងថាគាត់សុំចាកចេញពីក្លិបនារដូវក្ដៅនេះ។ Kovacic កីឡាករនៃក្រុមជម្រើសជាតិក្រូអាតរូបនេះមិនមានការអាក់អន់ចិត្ត ឬមិនមានអ្វីដែលគាត់មិនសប្បាយចិត្តនោះទេនៅឯកីឡដ្ឋាន Bernabeu ប៉ុន្តែគាត់មានគោលដៅចង់បង្ហាញខ្លួនក្នុងជម្រើស ១១ នាក់ឲ្យបានញឹកញាប់ជាងមុន ខណៈដែលរដូវកាលមុនគាត់ចូលលេងក្នុងជម្រើសដំបូងឲ្យ Real បានតែ ១៤ ប្រកួតប៉ុណ្ណោះនៅក្រោមការដឹកនាំរបស់អតីតគ្រូបង្វឹកលោក Zinedine Zidane ។
តែទោះជាយ៉ាងណា វិទ្យុអេស្ប៉ាញ Cadena Cope បានបង្ហើបថា Real មិនឆ្លើយតបនឹងសំណើរបស់ Kovacic ដែលបានបង្ហាញនូវចេតនាចង់ចាកចោលពួកគេនោះទេ ហើយពួកគេនឹងមិនទទួលយករាល់សំណើពីក្លិបណាទាំងអស់ដែលដាក់ដើម្បីដេញថ្លៃមកលើកីឡាករវ័យ ២៤ ឆ្នាំរូបនេះ។ Kovacic បានមកជ្រកកោនជាមួយ Real Madrid ដែលជាក្រុមម្ចាស់ជើងឯកពាន Champions League ១៣ សម័យកាលមួយនេះកាលពីឆ្នាំ ២០១៥ ប៉ុន្តែមួយរយៈក្រោយនេះគាត់ត្រូវបានផ្សាភ្ជាប់ជាមួយការផ្ទេរទៅចុះចូលជាមួយក្រុមល្បីៗមួយចំនួននៅអឺរ៉ុបដែលមានដូចជា ៖ Juventus, AC Milan, Inter Milan និង Schalke របស់អាល្លឺម៉ង់។
ប្រែសម្រួល ៖ ភក្ដី
