ក្នុងពេលថ្មីៗនេះ មានការចែកចាយខ្សែអាត់វីដេអូ (YouTube) រយៈពេល ៣នាទី និង៤៧វិនាទី នៅក្នុងបណ្តាញសង្គម Facebook ស្តីអំពីដង្កូវគីនី(ឈ្មោះហៅនៅក្នុងវីដែអូ)។ ប៉ុន្តែវីដេអូនេះមិនបានបញ្ជាក់អំពីទីតាំង កាលបរិច្ឆេទ និងអ្នកផលិតឱ្យបានជាក់លាក់នោះទេ។ បន្ទាប់ពីទទួលបានពត៌មាននេះមក នាយកដ្ឋានជីវៈចម្រុះនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព ក៏បានសិក្សាស្រាវជ្រាវរកប្រភពនៃព័ត៌មាននេះ ដើម្បីឈានទៅកំណត់អត្តសញ្ញាណសត្វដែលបង្ហាញនៅក្នុងវីដេអូនោះឱ្យបានត្រឹមត្រូវ។
តាមការសិក្សា និងសាកសួរព័ត៌មានបឋមពីអ្នកនេសាទនៅខេត្តកោះកុង និងខេត្តកំពត បានឱ្យដឹងថា សត្វដែលមានភិនភាគដូចក្នុងវីដេអូនោះ គឺមានវត្តមាននៅក្នុងទឹកភ្លាវ ក្នុងតំបន់ពាមសមុទ្រ ម្តុំកោះកាពិ កោះម៉ន កោះកុត ពាមក្រសោបក្នុងខេត្តកោះកុង និងមាត់សមុទ្រដែលមានដុះព្រៃកោងកាង ចំងាយ២០គម ពីទីរួមខេត្តកំពត។ វត្តមានរបស់វា គឺសម្បូរនៅពេលទឹកនាច (ទឹកស្រក)មុនបុណ្យភ្ជុំបិណ្ឌ ក្នុងខែកញ្ញា និងតុលា។ អ្នកនេសាទក៏បានបញ្ជាក់ទៀតថា សត្វនោះមានរូបរាងដូចសត្វឈ្លើង ហើយមាន ប្រវែងរហូតដល់ទៅ ៣តឹក (៣០សម) គឺត្រូវគ្នានឹងរូបក្នុងវីដេអូ (នាទីទី ១.០៣) និងរស់នៅក្នុងព្រៃកោងកាង ជាពិសេសនៅលើដើមឈើងាប់។
ចំណែកឈ្មោះដង្កូវគីនីដែលបានហៅក្នុងវីដេអូនោះ មានឈ្មោះវិទ្យាសាស្ត្រថា Platydemus manokwari និងមានប្រភពដើមនៅប្រទេសប៉ាពូនូវែលហ្គីណេ (New Guinea) ហើយកំពុងតែក្លាយជាប្រភេទសត្វរាតត្បាតនៅលើពិភពលោក និងនៅប្រទេសកម្ពុជាយើងដែរ ហើយដែលខ្មែរយើងហៅដង្កូវគីនី នេះថាជាខ្យងឥតសំបក។
យោងតាមលក្ខណៈជីវសាស្ត្រ និងអេកូឡូស៊ីរបស់ ដង្កូវគីនី ឬ ខ្យងឥតសំបក គឺវារស់នៅលើគោក និងមានប្រវែងខ្លួនពី ៤សម ទៅ ៦,៥សម (ប្រវែងប្រមាណ១ចង្អុលដៃ) គឺវាខុសពីសត្វដែលបានបង្កាញក្នុងវីដេអូ ដែលមានប្រវែងខ្លួនវែងជាងដង្កូវគីនីរហូតដល់ទៅ ៥ដង គឺដូចគ្នាទៅនឹងពត៌មានរបស់អ្នកនេសាទដែលបានបញ្ជាក់ថាសត្វនោះមានប្រវែងរហូតដល់ទៅ ៣០សម។ ដូច្នេះយើងអាចធ្វើការសន្និដ្ឋានបឋមថា៖ សត្វដែលមានភិនភាគដូចក្នុងវីដេអូនោះ មិនមែនជា ដង្កូវគីនី ឬ ខ្យងឥតសំបក ឡើយ។
បច្ចុប្បន្ន នាយកដ្ឋានជីវៈចម្រុះនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៏ដោយចីរភាព កំពុងសិក្សាស្រាវជ្រាវរកពត៌មានបន្ថែម និងប្រមូលសំណាកសត្វនេះ ដើម្បីកំណត់អត្តសញ្ញាណឱ្យបានត្រឹមត្រូវ។ នាយកដ្ឋានជីវៈចម្រុះនឹងធ្វើបច្ចុប្បន្នភាពពត៌មានលម្អិតអំពីប្រភេទនេះបន្ថែមទៀតនៅពេលដែលក្រុមអ្នកជំនាញទទួលបានពត៌មាន ឬ បានសិក្សាពីលក្ខណៈវិទ្យាសាស្រ្តច្បាស់លាស់របស់ប្រភេទនេះ។ប្រភពFB
សូមទស្សនាវីដេអូខាងក្រោម ៖
