ភ្នំពេញ៖ បុរសម្នាក់ស្រវឹងស្រា ជិះម៉ូតូជ្រុលចង្កូតទៅបុករថយន្តលោកឧកញ៉ា ឌួង ឆាយ បណ្ដាលឲ្យរងការខូចខាតតិចតួច ស្វាងស្រាចែស ហេតុការណ៍នេះ បានបង្កឲ្យមានការភ្ញាក់ផ្អើលនៅវេលាម៉ោងជាង១០យប់ ថ្ងៃទី៥ ខែមីនា ឆ្នាំ២០១៩ តាមបណ្ដោយមហាវិថីព្រះនរោត្តម សង្កាត់បឹងកេងកង១ ខណ្ឌចំការមន រាជធានីភ្នំពេញ។
មុនពេលកើតហេតុគេឃើញយុវជនពីរនាក់ស្រវឹងស្រាបានបើកម៉ូតូមួយគ្រឿងម៉ាក HONDA DREAM ពណ៌ខ្មៅពាក់ស្លាកលេខ ភ្នំពេញ 1FI-1094 ក្នុងល្បឿនលឿនលុះមកដល់ចំណុចកើតហេតុស្រាប់តែម៉ូតូចាប់ហ្វ្រាំងមិនទាន់ក៏ជ្រុលទៅបុកចំរថយន្តស៊េរីទំនើប ម៉ាក Roll Royce ពណ៌ស ដែលជារថយន្តរបស់លោកឧកញ៉ា ឌួង ឆាយ បណ្ដាលឲ្យរងការខូចខាតតិចតួច ។ ចំណែកឯអ្នកបើកម៉ូតូនិងអ្នករួមដំណើររងរបួសបែកមុខបែកមាត់តែប៉ុណ្ណោះ។
មួយសន្ទុះក្រោយមក លោកឧកញ៉ា ឌួង ឆាយ ក៏បានបើកបរចាកចេញពីកន្លែងកើតហេតុ ដោយបានប្រាប់ឲ្យខាងមន្រ្ដីជំនាញដោះស្រាយចំពោះរឿងមួយនេះ ហើយចំពោះករណីគ្រោះថ្នាក់ចរាចរណ៍នេះ គេឃើញគេហទំព័រហ្វេសប៊ុករបស់លោកឧកញ៉ា ឌួង ឆាយ បានបង្ហោះសារដោយសរសេរថា” ខ្ញុំពិតជាមានអារម្មណ៍សោកស្តាយ និងឈឺចាប់បំផុត ពេលដែលគេបុកឡានខ្ញុំហើយមិនដឹងកំហុសខ្លួនឯងខ្ញុំនឹងមិនលើកលែងទោសអោយមនុស្សដែលមិនស្គាល់ពីកំហុសរបស់ខ្លួនឯង និងមនុស្សត្រូវចាប់ផ្តើមរៀនទទួលលទ្ធផលនៃកំហុសរបស់ខ្លួនឯង ជាពិសេសម៉ូតូបើកបរមិនគោរពច្បាប់ចរាចរណ៍ និងស្មារតីក្រោមជាស្រវឹង ។ មាសប្រាក់មិនសំខាន់ សំខាន់ឡានខ្ញុំគេឈប់ផលិត និងខ្ញុំមានបំណងទុកជាកេរ្តិ៍ប្រចាំត្រកូលរហូត” ។
សមត្ថកិច្ចជំនាញបានធ្វើការឃាត់ខ្លួនអ្នកបើកបរម៉ូតូនិងអ្នករួមដំណើរយកទៅអធិការខណ្ឌចំការមនដើម្បីធ្វើការសាកសួរនាំបន្តផងដែរ ៕
ប្រភព៖ FB
