(ភ្នំពេញ)៖ នៅព្រឹកថ្ងៃទី០៥ ខែមីនា ឆ្នាំ២០១៩ គណៈកម្មាធិការអចិន្ត្រៃយ៍រដ្ឋសភា ដឹកនាំដោយសម្តេច ហេង សំរិន បានបើកកិច្ចប្រជុំ ដើម្បីពិនិត្យការស្នើសុំផ្លាស់ប្តូរសមាសភាពក្រុមប្រឹក្សាធម្មនុញ្ញ សម្រាប់អាណត្តិថ្មី។ សមាសភាពក្រុមប្រឹក្សាធម្មនុញ្ញ លើកទី៧ រយៈពេល ៣ឆ្នាំ ត្រូវផុតកំណត់ នៅឆ្នាំ២០១៩ នេះ។ ក្នុងនោះ រដ្ឋសភា បានសម្រេចប្រកាសជ្រើសរើសឥស្សរជន ១រូប ជំនួសឯកឧត្តម មឹន ស៊ាន សមាជិកក្រុមប្រឹក្សាធម្មនុញ្ញ ដែលត្រូវបញ្ចប់អាណត្តិ។ ឯកឧត្តម មឹន ស៊ាន បានកាន់តំណែងជាសមាជិកក្រុមប្រឹក្សាធម្មនុញ្ញ ចាប់តាំងពីឆ្នាំ២០១០។
ក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី០៥ ខែមីនា ឆ្នាំ២០១៩ អង្គប្រជុំ បានធ្វើការពិភាក្សា និងអនុម័តតាមរបៀបវារៈ ដោយបានអនុម័តលើសំណើសុំជ្រើសតាំងសមាជិកក្រុមប្រឹក្សាធម្មនុញ្ញថ្មី ០១រូប សម្រាប់ជំនួសលោក មឹន ស៊ាន សមាជិក ក្រុមប្រឹក្សាធម្មនុញ្ញ ដែលត្រូវបញ្ចប់អាណត្តិ។
គណៈកម្មាធិការអចិន្ត្រៃយ៍រដ្ឋសភា បានសម្រេចប្រគល់ភារកិច្ចជូនអគ្គលេខាធិការដ្ឋានរដ្ឋសភា ធ្វើសេចក្តីជូនដំណឹងផ្សព្វផ្សាយជ្រើសរើសឥស្សរជន មានលក្ខណៈសម្បត្តិសមស្រប ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ។
សមាសភាពក្រុមប្រឹក្សាធម្មនុញ្ញ ទាំង ៩រូប នៅអាណត្តិទី៧ ចាប់ពីឆ្នាំ២០១៦ ដល់ឆ្នាំ២០១៩ រួមមាន៖
១-លោក អ៊ឹម ឈុនលឹម ប្រធាន
២-សម្តេច នរោត្តម សិរីវុឌ្ឍ សមាជិក
៣-លោក មឹន ស៊ាន សមាជិក
៤-សម្តេចព្រះមហិស្សរា នរោត្តម ច័ក្រពង្ស់ សមាជិក
៥-សម្តេចរាជបុត្រីព្រះរៀម នរោត្តម បុប្ផាទេវី សមាជិក
៦-លោក អ៊ុត ឈន សមាជិក
៧-លោក សំ ព្រហ្មនា សមាជិក
៨-លោក អ៊ឹម សួស្តី សមាជិក
៩-លោក ហ៊ី សោភា សមាជិក
សូមរម្លឹកថា សមាសភាពក្រុមប្រឹក្សាធម្មនុញ្ញ ទាំង ៩រូប គឺមាន ៣រូប ជ្រើសតាំងដោយរដ្ឋសភា ៣រូប ជ្រើសតាំងដោយឧត្តមក្រុមប្រឹក្សាអង្គចៅក្រោម និង៣រូប តែងតាំងដោយព្រះមហាក្សត្រ៕
សូមអានសេចក្តីប្រកាសដូចខាងក្រោម៖
